الشروط والأحكام

مين إحنا

مرسيفل جروب (دبونو) — بيت تحميص بن مصري، بنبيع من موقعنا dpono.com ومن فروعنا. استخدامك للموقع أو طلبك منه معناه إنك موافق على الشروط دي.

الطلب

• الطلب بيتسجّل أول ما تدوس «أكّد الطلب» ويظهرلك رقمه على الشاشة — وتقدر تتابعه أو تعدّله من «طلباتي» على نفس الموبايل لحد ما يخرج للشحن.
• قبل التأكيد لازم تعلّم على «قريت ووافقت على الشروط وسياسة الاسترجاع».
• كل الأسعار بالجنيه المصري وشاملة الضريبة.
• لو حصل خطأ واضح في السعر المعروض، من حقنا نلغي الطلب ونرجّعلك اللي دفعته كامل قبل ما نشحن. هنبلّغك بالسبب.

التوفّر

بنحمّص على دفعات صغيرة، فممكن منتج يخلص بعد ما تطلبه. لو حصل، بنكلّمك ونخيّرك: بديل، أو انتظار الدفعة الجاية، أو استرداد كامل.

الشحن والتوصيل

• الطلب اللي قيمة منتجاته ٦٥٠ جنيه أو أكتر شحنه ١٠ جنيه بس لأي محافظة (مفيش شحن مجاني).
• الطلب اللي أقل من ٢٥٠ جنيه بيدفع سعر الشحن الكامل (القاهرة والجيزة ٨٥ ج) — الرقم بيظهرلك في السلة وصفحة الدفع قبل ما تأكد.
• بنشحن عن طريق شركة توصيل، ومدة التوصيل بتختلف حسب المنطقة.
• بعض المناطق بتتخدم من نقطة استلام مش توصيل للباب — وده بيظهرلك في صفحة إتمام الطلب قبل ما تدفع.
• لو المندوب مقدرش يوصلك بعد ٣ محاولات، الطلب بيرجع لينا ومصاريف الشحن بتتخصم.
• فتح الشحنة قدام المندوب مش متاح — افتحها بعد الاستلام، ولو فيه مشكلة صوّرها وكلّمنا خلال ٤٨ ساعة.
• لو رفضت الاستلام من غير سبب، الطلب الجاي بيتدفع شحنه مقدّم (التفاصيل في سياسة الاسترجاع).

الدفع

• الدفع عند الاستلام — بتدفع للمندوب وقت التسليم.
• طرق الدفع الأونلاين بتظهر في صفحة إتمام الطلب لما تكون متاحة.
• لو دفعت مقدّم كله أو جزء منه، المندوب بيحصّل الباقي بس.

الإلغاء

تقدر تلغي أي طلب قبل ما يخرج للشحن بمكالمة أو رسالة واتساب، ومن غير أي رسوم. بعد ما يخرج، بيتحوّل لاسترجاع حسب سياسة الاسترجاع.

بياناتك

بنجمع اسمك ورقمك وعنوانك عشان نوصّلك الطلب، وبنشاركهم مع شركة الشحن لهذا الغرض بس. التفاصيل في سياسة الخصوصية.

الصور والمحتوى

صور المنتجات للتوضيح، وممكن يحصل فرق بسيط في شكل العبوة أو لون البن حسب الدفعة والتحميص. محتوى الموقع من صور ونصوص ملك دبونو.

حدود المسؤولية

مسؤوليتنا عن أي طلب محدودة بقيمة الطلب نفسه. المنتجات دي أطعمة ومشروبات — لو عندك حساسية من مكوّن معيّن، راجع بيانات المنتج أو اسألنا قبل ما تطلب.

تعديل الشروط

ممكن نعدّل الشروط دي، والنسخة السارية على طلبك هي اللي كانت منشورة وقت ما طلبت.

القانون والتواصل

الشروط دي بتخضع للقانون المصري. لأي استفسار: واتساب 0111 402 1275 · info@dpono.com